LIBRENG WI-FI SA BARANGAY MARANDING SA LALA LANAO DEL NORTE GIPANGBUTANG NA SA MGA NAGKADAIYANG LUGAR SA MAONG BARANGAY

LIBRENG WI-FI SA BARANGAY MARANDING SA LALA LANAO DEL NORTE GIPANGBUTANG NA SA MGA NAGKADAIYANG LUGAR SA MAONG BARANGAY

Gisugdan na karon ang pagtukod sa libreng Wi-Fi Project sa Barangay Maranding nga usa ka mahinungdanong lakang padulong sa mas modernong serbisyo alang sa komunidad.

Kini ang usa ka flagship projects sa Barangay Maranding nga gipangunahan ni Kap.Rarai Pongase nga nagtumong sa paghatag og libre  nga internet connection sa tanang katawhan ilabina ang anaa sa sentrong bahin sa maong barangay.

Ang mga Wi-Fi tower gibutang sa mga lugar sama sa Barangay Hall, duol sa Maranding Community Hospital ug sa plaza Arcade, aron mas daghang residente ang makabenepisyo niini.

Segun ni Kapitan Rarai Pongase, nga pinaagi niini nga proyekto, mas sayon paspas ug mas epektibo ang komunikasyon sa barangay ug mga residente ilabina nga ang Maranding isa sa nahimong sentro sa komersyo sa Lala.

Gidugang pa sa Kapitan nga dako kini og tabang sa mga estudyante alang sa ilang pag skwela ug ang online learning, ilabi na karon nga ang teknolohiya nahimong isa sa  mahinungdanon sa edukasyon.

Dugang pa sa kapaitan nga  makatabang usab kini sa negosyo, serbisyong panglawas ug sa mga emergency ilabina ang mga  nagkinahanglan og dali, paspas ug tukma nga impormasyon.

Gipasalamatan ni Barangay Chairman Rarai Pongase ang tanang miyembro sa Barangay Council sa ilang walay hunong nga pagsuporta ug paningkamot aron matuman ang iyang mga damgo na proyekto alang sa mga katawhan sa Maranding. Matud pa niya, nga ang Free Wi-Fi dili lamang luho kundili usa ka nag-unang serbisyo nga makatabang sa pagpalig-on sa kahibalo, koneksyon, ug kalamboan sa komunidad.

Naglaum usab siya nga mas mapalapad pa kini nga proyekto sa umaabot, aron mas daghang purok ang mabutangan og libreng Wi-Fi ug mas daghang lumulupyo sa Maranding ang makatagamtam sa benepisyo sa modernong teknolohiya.

Ang Free Wi-Fi Project sa Barangay Maranding usa sa mga daghan nga mga proyekto alang sa  pag-alagad sa katawhan—usa ka proyekto nga magdala og kahayag sa kaalam, koneksyon sa komunidad, ug paglaum sa mas malinawong kaugmaon kini segun pa ni Kap. Rarai Pongase.