150 KA MGA ATLETA SA LANAO DEL NORTE NGA MISALMOT SA NMRAA 2026 GIPASIDUNGGAN NILA GOV KHALID DIMAPORO UG CONG AMINAH DIMAPORO

Gipasidunggan sa Lanao del Norte ang mga estudyanteng atleta nga nakadaog og medalya ug gihingusgan ang pagduso niini alang sa mas lig-ong sports development atol sa Provincial School Board meeting niadtong Abril 13, 2026, didto sa Kalimudan Hall, nunot kini sa performance sa probinsiya sa bag-o lang nahuman nga NMRAA 2026 sa Bukidnon.

Ang mga atleta nga nagdala ug mga pasidungog alang sa probinsya. Isip timaan sa pagpasalamat, ang Provincial School Board mipresentar sa mga student-athletes atol sa panagtapok ug mihatag og cash incentives isip pag-ila sa ilang mga performance.

Mokabat sa 150 ka mga atleta ug coaches ang mitambong sa maong kalihukan. Ang mga gold medalist nakadawat og P3,850 matag usa,samtang ang mga silver medalist nakadawat og 2,800, ug ang mga bronze medalist nakadawat og 1,800.

Si Gov. Khalid Q. Dimaporo mipadayag sa iyang katagbawan sa gidaghanon sa mga atleta nga nakahatag ug lig-on nga resulta sa regional meet ug gipamatud-an pag-usab ang pasalig sa kagamhanang probinsiyal sa pagpalambo sa local sports talent.

Samtang si Cong. Aminah Dimaporo nihatag ug gibug-aton sa panginahanglanon nga mas palig-onon pa ang pagpalambo sa sports sa Lanao del Norte.

Lakip sa mga top-performing event sa probinsiya sa NMRAA 2026 mao ang gymnastics, archery, swimming, athletics, ug weightlifting.

Sa laing bahin, ang mga kuwalipikadong atleta gikan sa nagkalain-laing kalihukan maoy morepresentar sa Lanao del Norte sa Palarong Pambansa 2026 didto ipahigayon sa Agusan del Sur.