SAKTONG PAGLABAY SA MGA BASURA, GIHANGYO NGADTO SA KATAWHAN ILABI NA SA MGA COASTAL BARANGAY SA LALA

Gihangyo karon sa lokal nga panggamhanan sa Lala ang katawhan, ilabi na ang mga residente sa coastal barangays, nga magmatngon ug magpraktis sa saktong paglabay sa ilang mga basura aron maprotektahan ang kabaybayonan ug kinaiyahan.

Kini human makolekta ang kapin 40 ka sako sa nagkalain-laing basura atol sa gipahigayong coastal clean-up drive sa may baybayon sa Barangay Pacita Bucana,kini ang gibutyag ni SBM Mark Yap Ancanan atol sa 13th Regular Session niadtong Abril 27 2026.

Sumala ni SB Macoy Ancanan, ang Chairman sa Committee on Coastal Resource Management (CRM),nakuha nila ang 40 ka sako sa nagkalain laing basura sa kabaybayonan ug nagpadayon ang ilang panawagan sa komunidad nga mahimong responsable sa pagdumala sa ilang mga basura.

Dugang pa niya, importante ang pagtinabangay sa matag usa aron mapadayon ang kalimpyo sa dagat ug malikayan ang kadaut sa marine resources nga maoy panginabuhian sa daghang residente sa Lungsod.Ang coastal clean up drive gisalmutan sa mga nagkadaiyang ahensya sa gobyerno ug kapulisan ingonman mga residente ug mga brgy officials sa maong dapit.