SB MEMBERS SA LALA NAGDUSO OG USA KA SB RESOLUTION PARA SA PAGHATAG OG AYUDA SA MGA MAG-UUMA, JOB ORDERS UG MGA MANANAGAT

Usa ka SB resolusyon ang pormal nga giduso sa konseho sa Lungsod sa Lala atol sa ilang 13th regular session niadtong Lunes April 6 2026, diin ang tumong mao ang paghatag og dinalian nga ayuda alang sa mga mag-uuma, mananagat ug ang mga empleyado sa Municipiyo nga ang status mao ang Job Order (JO).

Ang maong SB resolution giduso ni SBM Dick Avila Salimbangon, isip tubag sa nagpadayong pagsaka sa presyo sa gasolina ug sa uban pang mga palaliton nga dako og epekto sa panginabuhian sa katawhan.

Samtang nakakuha og lig-on ug solidong suporta ang maong resolusyon gikan sa ubang mga sakop sa Sangguniang Bayan sa Lala. Lakip sa mga nagpakita sa ilang pagsalig ug suporta mao sila SBM Allan Guzman, Engr. Rone Dejarme, Engr. Rosie C. Javate ug ang uban pang mga konsehales sa Lungsod.

Nakita sa mga opisyal sa Lungsod nga nagkalisod ang mga sektor sa agrikultura ug panagat sa pagpadayon sa ilang operasyon. Ang maong ayuda gilauman nga makapagaan sa gibating crisis karon sa mga mag-uuma ug mananagat aron makatabang sa galastuhan sa makinarya ug transportasyon ug pundo sa gasolina sa ilang mga panagatan.

Gipaabot karon sa publiko ang dugang pang mga detalye kalabot sa porma ug kantidad sa maong ayuda sa higayon nga hingpit na kining maaprobahan ug mapatuman sa lokal nga kagamhanan sa Lungsod sa Lala.