USA KA INAHAN NGA TAGA BRGY SIMPAK SA LALA, NANINGKAMOT UG NANGINABUHI NGA PATAS PARA SA IYANG PAMILYA

Viral karon sa social media ang istorya sa usa ka inahan nga taga Purok 6, Barangay Simpak, Lala, Lanao del Norte, nga naningkamot ug nanginabuhi nga patas human makita nga nangaryada ug binhi aron matustusan ang panginahanglanon sa iyang pamilya.

Sa usa ka trabaho nga kasagaran ginabuhat sa mga lalaki, wala magduha-duha ang maong inahan sa pagpaningkamot bisan paman sa kabug-at sa maong trabaho.

Gipakita niya nga ang responsibilidad sa pagpakaon ug pag-atiman sa pamilya dili lamang limitado sa gender, kundili naa sa kadasig ug determinasyon sa usa ka tawo.

Sumala sa mga netizens, ang iyang kahimtang usa ka pahinumdom nga sa karong panahona, ang bisan kinsa - lalaki man o babaye - makabuhat sa bisan unsang mga trabaho basta kini ginabuhat sa matarong ug patas ug walay naargabyado.

Daghang mga tawo ang na-inspire sa iyang istorya, nga nagpakita nga ang tinuod nga kusog dili lamang makita sa pisikal nga abilidad, kundili sa kasingkasing nga andam mosakripisyo alang sa pamilya.