DOST NAG-INSPEKSYON SA BAG-ONG SAFEWATRS UNITS ALANG SA DUHA KA BARANGAY SA LUNGSOD SA KAPATAGAN LANAO DEL NORTE

Gi inspeksyon sa Department of Science and Technology o DOST–Lanao del Norte ang bag-ong mi abot nga Safe Water Treatment System units nga naa gipahimutang sa Barangay La Libertad ug Barangay Kahayagan sa Lungsod sa Kapatagan.

Sumala sa DOST, tumong sa maong kalihokan nga masiguro nga ang mga water filtration system nakasunod sa gikinahanglan nga kalidad ug safety standards sa dili pa kini gamiton sa komunidad.

Ang inspeksyon gipangunahan sa DOST team nga gilangkuban nila Francis Tallo, Judy Palaca, Hope Bañas, Sameeha Ali, ug Earl Jhon Belaca-ol, uban sa LGU personnel nga sila Engr. Reanel Cuesta, MPDC ug Wilbur Campeciño, GSO.

Nahimong posible ang proyekto pinaagi sa inisyatiba ug suporta nila Mayor Beth Baguio-Ali ug Vice Mayor Barry Baguio, isip kabahin sa padayon nga pagpaningkamot sa LGU sa paghatag og limpyo ug luwas nga ma inumon nga tubig sa katawhan sa Kapatagan.

Gilauman nga ang Safe Water Treatment System units makatabang sa pagpalig-on sa water safety ug sa kahimsog sa mga residente sa maong mga barangay ug sa Lungsod.