MGA MEMBRO SA TASEGA GIHATAGAN OG SUPORTA SA PGLDN ARON MAPALAMBO ANG ILANG PRODUKSYON SA SEAWEEDS

Nakadawat og supporta ang mga seaweed farmers sa Barangay Tagulo, Sultan Naga Dimaporo niadtong Abril 28, 2026, isip kabahin sa pagpalig-on sa panginabuhian sa mga komunidad sa baybayon ug pagpataas sa ilang kapasidad sa produksyon.

Gipangunahan sa Provincial Agriculture Office kon PAgrO ang maong kalihokan ubos sa Enhanced Fisheries Production through Brackish and Marine Aquaculture Support Project, nga nakabenepisyo ang mga miyembro sa Tagulo Seaweeds Growers Association o TASEGA.

Apil sa gipanghatag ang mga kagamitan sama sa nylon twine, PVC rope floats, polyethylene ropes, ug seaweed propagules nga gikan sa Bureau of Fisheries and Aquatic Resources o BFAR.

Gihatagan usab og kahigayunan ang mga membro sa hands-on training ug technical discussions nga nagtutok sa seaweed production,maayong aquaculture practices, ug epektibong production techniques aron mapataas ang ani ug mapadayon ang kalamboan sa industriya.

Sumala sa PAgrO, ang maong inisyatibo makatabang sa pagdugang sa produksyon sa seaweeds, pagpalig-on sa kapasidad sa mga mangingisda, ug paghatag og padayon nga panginabuhian sa mga coastal communities sa Lanao del Norte.