VM MARCOS MAMAY, NAGPADAYON SA SHOWBIZ PROJECTS; BAG-ONG PELIKULA “KAPPA-TIRAN” ATANGAN

Dool sa kalibutan sa showbiz ang kasingkasing ni Nunungan, Lanao del Norte Vice Mayor Marcos Mamay. Gawas sa iyang papel isip Executive Adviser sa Actor’s Guild of the Philippines, siya usab ang nagdumala sa Mamay Productions.

Tumong sa iyang produksyon nga matabangan ang mga artista ug ang tibuok entertainment industry pinaagi sa pagprodyus og mga pelikula, serye, ug uban pang proyekto nga makahatag og kahibalo ug inspirasyon sa mga manan-aw.

Sa niaging tuig, gipasalida ang iyang inspirational biopic nga “MAMAY: A Journey to Greatness” nga gibidahan ni Jeric Raval. Si VM Mamay mismo ang nahimong assistant director kauban si Direk Neal “Buboy” Tan sa maong pelikula nga nakadaug og daghang parangal sa 73rd FAMAS Awards.

Karong panahona, nag-andam na usab sila ni Direk Buboy og bag-ong proyekto—ang pelikulang “Kappa-tiran.” Kini pagabidahan nila EJ Falcon, Aljur Abrenica, Bembol Roco, Sheryl Cruz, Patricia Javier ug Julio Diaz. Nakasugod na sila og story conference alang niini.

Sumala kang VM Mamay, ang pelikula maghisgot sa kalibutan sa fraternity ug ipakita ang nagkalain-laing sitwasyon nga masinati sa sulod niini.

Bisan dili kini base sa tinuod nga istorya, gihimo kini gikan sa mga report ug research bahin sa fraternity. Kadaghanan sa eksena kuhaan sa Metro Manila, apan adunay pipila ka parte nga gikuhaan sa Nunungan, Lanao del Norte.

 

Dugang pa ni VM Mamay, gusto usab nilang ipakita sa pelikula ang katahum sa ilang lugar aron mas mapalambo pa ang turismo sa Nunungan.